Mikabat sa 12 ka mga tawo ang naangol human nalimbuwad ang usa ka multicab sa tiilan sa Marcelo Fernan Bridge sa Lapu-Lapu City, Domingo sa gabii, Agosto 3, 2025.
Ang insidente nahitabo pasado alas 7:00 sa gabii samtang ang multicab nagbiyahe paingon sa Barangay Pusok. Sumala ni Nagiel Bañacia, hepe sa Lapu-Lapu City Disaster Risk Reduction and Management Office (DRRMO), ang tanang biktima dali nga gidala sa Lapu-Lapu City Hospital alang sa medikal nga atensyon.
Base sa kuha sa surveillance footage, nagdulhog paubos ang multicab gikan sa taytayan apan kalit kining naliko ug nalimbuwad sa daplin sa dalan.
Wala pa matino kung unsay hinungdan sa kalit nga disgrasya, apan giimbestigahan na kini sa mga awtoridad. Sa mga pasahero nga naangol, tulo niini mga bata nga hangtod karon padayong giatiman sa mga doktor sa maong ospital.
Uban sa mga ginikanan ug ubang pasahero, ila usab nga gipaubos sa sunod-sunod nga medical check-up aron masuta ang grabeng kadaot sa ilang lawas.
Nagpahimangno ang mga otoridad sa mga drayber nga mag-amping ug likayan ang pasobra nga karga sa sakyanan aron malikayan ang susamang aksidente, samtang padayon ang imbestigasyon kung dunay posibilidad sa mekanikal nga deperensya o kakulangan sa pagmintinar sa sakyanan.