Usa ka person with disability (PWD) ang namatay human kini pusila sa usa ka hubog nga pulis atol sa kapistahan sa Barangay 6, Tuburan, Cebu sayo sa buntag sa Biernes, Hunyo 13, 2025.
Naila ang suspek nga si Police Staff Sergeant (PSSg) Florante Perucho Hoyle, nga nakadestino sa City Investigation and Detective Management Unit (CIDMU) sa Cebu City Police Office. Ang biktima giila nga si Leo Vergel Fin Suico, usa ka PWD nga nagpuyo ra sa lugar diin nahitabo ang insidente.
Sumala sa imbestigasyon sa Tuburan Police Station, nadawat nila ang usa ka tawag gikan sa usa ka concern citizen kabahin sa pagpamusil. Pag-abot sa kapulisan sa lugar, ilang nakit-an ang biktima nga nagkadugo ug nahagba sa iyang tugkaran.
Sa testimonya sa mga saksi, miabot si Hoyle sa maong lugar nga hubog ug nakiglalis sa usa ka grupo sa mga lalaki. Gisagpa pa niya si Leonel Angelio Flores sa wala damhang rason, ug unya gikuha ang iyang armas ug mipabuto og pusil paingon sa yuta. Naghusay ang mga tawo, apan misulod si Hoyle sa balay ni Suico ug gipusil kini sa ulo. Gidala pa ang biktima sa Tuburan District Hospital apan gideklara nga dead on arrival.
Nagpailawom na sa kustodiya sa kapulisan si Hoyle samtang gikuha gikan kaniya ang usa ka COLT .45 kalibre nga pistola nga may magazine ug usa ka empty shell. Padayon ang imbestigasyon sa maong kaso aron masiguro ang hustisya sa biktima.
I via Renante Socia Lada