Padayon ang Cebu Provincial Government, pinaagi sa Provincial Disaster Risk Reduction and Management Office (PDRRMO), sa paghatod og hinabang ug serbisyo ngadto sa mga pamilya nga naapektuhan sa magnitude 6.9 nga linog nga miigo sa Amihanang bahin sa Cebu niadtong Septiyembre 30, 2025.
Sumala sa Situation Report No. 27 nga gi-update sa Oktubre 15, 2025, alas-5:00 sa hapon, nakapanghatag na ang Kapitolyo og ₱1,435,388 nga total resources, lakip na ang 810,883 litros nga ilimnong tubig, 96,974 ka sako sa bugas, 103,623 ka relief packs, ug 253,051 ka buok nga tambal ug medical supplies alang sa mga apektadong residente.
Gipahibalo usab nga ang probinsya nakadawat og ₱128.55 milyon nga monetary donations gikan sa nagkadaiyang donors ug partner agencies. Kini nga pondo gigamit aron masiguro ang transparent ug episyente nga pag-apod-apod sa tabang sa 15 ka apektadong LGUs, diin Bogo City, Medellin, ug Daanbantayan ang nakadawat sa pinakadakong ayuda base sa kadaghanon sa kadaut ug populasyon nga naapektuhan.
Nagpabilin ang pasalig sa Kapitolyo nga ipadayon ang relief ug rehabilitation efforts hangtod makabangon pag-usab ang mga komunidad nga grabe ang kadaut sa linog. Gihangyo usab sa probinsya ang kooperasyon sa tanan aron mapadali ang pagpanghatag sa tabang ug mapalig-on ang kaluwasan ug kahimtang sa mga tawo sa Amihanang Cebu.
Source: Cebu Province PIO
I via Renante Socia Lada