Pormal nga nanumpa ang mga napiling class officers sa Police Community Affairs and Development Course o PCADC Class 02-051-R7-2026-016 “MAGILIW” sa seremonya nga gihimo sa Camp Sergio Osmeña Sr., Cebu City kagahapong Septiyembre 17, 2026.
Girepresentahan ni PCOL Kimberly E. Molitas, Chief of Regional Staff, si PRO7 Regional Director PBGEN Arnold E. Abad atol sa induction ug oath-taking ceremony.
Ang 45 ka adlaw nga PCADC training nagtumong sa pagpalambo sa kahibalo ug kahanas sa mga pulis sa pakig-uban sa komunidad, pagtukod og maayong relasyon, ug pakigtambayayong sa lain-laing sektor aron mas epektibong malikayan ang krimen ug mapadayon ang kalinaw ug kahapsay.
Gipahinumdoman ni PBGEN Abad ang mga partisipante nga suportahan ang ilang mga class officers ug ipakita ang integridad, disiplina, propesyonalismo ug responsibilidad isip mga lider. Matod niya, importante nga mapalig-on ang pagsalig ug kooperasyon tali sa kapulisan ug komunidad aron mas mahatagan og paspas ug angay nga serbisyo ang publiko.
Kabahin usab sa tumong sa PCADC ang pagpalig-on sa koordinasyon sa mga barangay opisyal, lokal nga kagamhanan, eskwelahan, civic organizations ug uban pang grupo sa komunidad alang sa crime prevention, peace and order ug public safety.
Giingon sa PRO7 nga padayon nilang palig-onon ang mga pulis dili lamang sa pagpatuman sa balaod, kundili usab sa pagtukod og lig-on nga relasyon ug pagsalig tali sa kapulisan ug katawhan.
I via Renante Socia Lada