Gipahimangnoan sa Police Regional Office 7 (PRO7) ang publiko nga ang pagpakatap sa bakak o dili siguro nga impormasyon, ilabi na sa social media ug ubang digital platforms, usa ka krimen nga silutan ubos sa balaod sa Pilipinas.
Gisulti kini nga pahimangno human mikaylap ang usa ka viral post sa social media nga sayop nga miingon nga adunay tulis nga nahitabo sa Mandaue City niadtong Hulyo 22, 2025. Ang maong post gikan sa usa ka lokal nga istasyon sa radyo, nga misangpot sa kahadlok ug kalibog sa katawhan.
Gipasabot sa kapulisan nga ang maong insidente wala gayud nahitabo sa Mandaue City. Nasuta nga ang video nga gikuwestyon gikan pa diay sa Barangay Yati, Liloan, Cebu niadtong Mayo 8, 2025, diin nagkasumpaki lang ang mga pasahero sa usa ka bus ug nauli kini sa sumbagay. Wala kini nareport sa kapulisan hangtod mikaylap ang video online.
Misugot ang istasyon sa radyo nga wala nila mapanghimatuud ang video ug gi-post kini base lang sa gipasa nga impormasyon sa usa ka concerned citizen. Nangayo na sila og pasaylo, gi-correct ang post, ug nagpagawas og klaripikasyon.
Gipahimangno-an sa PRO7 nga ubos sa Republic Act 10175 o Cybercrime Prevention Act of 2012, ang bisan kinsa nga namakak o walay pag-amping nga mipakatap og sayop nga impormasyon nga makahatag og kagubot, kahadlok, o kadaot sa laing tawo, mahimong mag-atubangon og kasong kriminal.
Gi-awhag sa PRO7 ang pagkamabinantayon ug responsable nga paggamit sa social media. Gidasig usab nga siguruhon una ang impormasyon sa dili pa ipakatap.
Source: PRO7
I via Renante Socia Lada