Ang Police Regional Office 7 (PRO7) mao ang nakakab-ot sa pinakataas nga crime reduction sa tibuok nasud base sa rekord sa walo ka major o “focus crimes,” ug nanguna sa tanang 18 police regional offices sa Pilipinas.
Sumala sa datos nga gipresentar ni PLTGEN Jose Melencio C. Nartatez Jr., Acting Chief sa PNP, ngadto ni House Speaker Faustino “Bojie” Dy III karong Oktubre 28, 2025, nakab-ot sa PRO7 ang 28.41% nga pagkunhod sa walo ka focus crimes, gikan sa 2,749 kaso (Enero–Oktubre 2024) ngadto sa 1,968 kaso sa parehas nga panahon karong 2025, o 781 ka kaso nga mikunhod.
Ang maong mga krimen naglakip sa murder, homicide, physical injury, rape, robbery, theft, ug carnapping sa sakyanan ug motorsiklo, nga gigamit isip timailhan sa kahapsay ug kalinaw sa nasud. Ang maayong resulta sa PRO7 gumikan sa mas hugot nga kampanya batok krimen, kusog nga presensya sa kapulisan, lig-on nga intelligence operations, ug tabang sa komunidad sa tibuok Central Visayas.
Sa iyang mensahe, PBGEN Redrico A. Maranan, Regional Director sa PRO7, mipasidungog sa tanang sakop sa kapulisan sa ilang dedikasyon ug pagkahiusa sa pagserbisyo.
“This achievement reflects the collective effort, discipline, and dedication of every police officer in PRO7. I salute our men and women in uniform for their relentless pursuit of peace and order in Central Visayas. Let us continue working together with the same passion and integrity to keep our communities safe,” matod ni PBGEN Maranan.
Nagpabilin ang PRO7 nga lig-on sa pagpadayon sa adbokasiya sa “Bagong PNP para sa Bagong Pilipinas: Serbisyong Mabilis, Tapat, at Nararamdaman”, aron mapalig-on pa ang pagsalig sa publiko ug mapadayon ang kalampusan sa crime prevention ug law enforcement sa rehiyon.
Source: PRO7- PIO
I via Renante Socia Lada