Nasikop sa operasyon sa kapulisan ang usa ka regional-level top drug personality nga nailhan nga si alyas “Cali” ug nasakmit ang gibanabana nga 2.5 kilo nga shabu nga nagkantidad og ₱17 milyon sa Mandaue City, Cebu, niadtong Agosto 9, 2025.
Ang operasyon nga gihimo alas 9:35 sa gabii sa Sitio Uniwide, Barangay Tipolo, gipangulohan sa hiniusang pwersa sa Mandaue City Police Office (MCPO) City Drug Enforcement Unit, City Intelligence Unit, Regional Intelligence Division 7, Regional Police Drug Enforcement Unit, PNP Drug Enforcement Group 7, ug Philippine Drug Enforcement Agency (PDEA) 7.
Nakuha gikan sa suspek ang mga plastic sachet nga adunay shabu, buy-bust money, ₱500 cash nga gituohang gikan sa iligal nga drogas, usa ka Samsung keypad cellphone, ug backpack. Ang nakumpiskar drogas gisumite sa Regional Forensic Unit 7 para sa laboratoryo nga pagsusi.
Karon, gitanggong si “Cali” sa custodial facility sa Police Station 6, MCPO samtang giandam ang papeles para sa kaso. Sumala ni PBGEN Redrico A. Maranan, Regional Director sa PRO7, klaro nga mensahe kini sa mga nalambigit sa iligal nga drogas nga wala silay kapadulngan gawas sa hustisya.
Source: PRO7-PIO
I via Renante Socia Lada