Nasikop ang usa ka 41-anyos nga babaye ug nakuhaan og gibanabana nga PhP13.6 milyon nga kantidad sa giingong shabu atol sa usa ka buy-bust operation nga gihimo sa Sitio Aroma, Barangay Subangdaku, Mandaue City niadtong Abril 11, 2025.
Ang suspetsado, giilang usa ka high-value individual ug giingong drug repacker, nadakpan pinaagi sa panaghiusa sa mga operatiba sa Police Station 2 sa Mandaue City Police Office (MCPO), PDEA RO7-RSET MCO, City Intelligence Unit, ug Regional Intelligence Division 7.
Nasakmit gikan sa dinakpan ang 2,000 ka gramos sa giingong shabu nga gisulod sa lain-laing gidak-on sa heat-sealed plastic sachets. Ang drogas gibana-bana nga adunay street value nga PhP13,600,000.00. Lakip usab sa ebidensya ang usa ka marked P500 bill, tulo pa ka P500 nga giingong gikan sa drug transactions, ug usa ka navy-blue nga shoulder bag nga gigamit sa pagdala sa mga illegal nga drogas.
Ang tanang ebidensya gipadala na sa Regional Forensic Unit 7 para sa laboratory analysis. Sa pagkakaron, ang suspetsado gibantayan sa kustodiya sa Police Station 2 samtang gi andam na ang pagpasaka sa kasong paglapas sa RA 9165 o Comprehensive Dangerous Drugs Act of 2002.
Gidayeg ni Police Brigadier General Redrico A. Maranan, Regional Director sa PRO7, ang koordinasyon sa tanang unit nga nalambigit sa operasyon.
Source: PRO7- PIO
I via Renante Socia Lada
#rpndykccebu