Nakatala og dakong kalampusan ang Police Regional Office 7 (PRO7) sa ilang kampanya batok iligal nga drogas sa tibuok tuig 2025, isip kabahin sa padayon ug hugot nga paningkamot aron mapapas ang mga drug network ug mapanalipdan ang mga komunidad sa Central Visayas.
Gikan Enero hangtod Disyembre 2025, nakahimo og 8,244 ka anti-illegal drug operations ang PRO7 nga misangpot sa 9,568 ka nadakpan, lakip na ang 410 ka high-value suspects. Tungod niini, nakumpiskar ang 129,681.12 gramos sa gituohang shabu nga nagkantidad og ₱881.8 milyon sumala sa Standard Drug Price.
Nakakuha usab ang kapulisan og 3,231.63 gramos sa uga nga dahon sa marijuana ug 14,421 ka tanom sa marijuana nga nagkantidad og kapin ₱3.27 milyon. Dugang pa niini, nasakmit ang 284.71 gramos sa cocaine nga kantidad og ₱1.5 milyon, ug 60 ka tableta sa ecstasy nga balor og ₱102,000.
Sumala kang Regional Director PBGen Redrico A. Maranan, ang kalampusan tungod sa dedikasyon, disiplina, ug panaghiusa sa mga personahe sa PRO7, uban ang lig-on nga intelihensya ug tabang sa mga kauban nga ahensya.
Matod pa ni PBGen Maranan, magpadayon ang PRO7 sa hugot, intelligence-based, ug legal nga operasyon batok iligal nga drogas, subay sa direktiba sa nasudnong pagpangulo sa PNP, aron mapugngan ang pagsamot sa iligal nga drogas ug mapadayon ang kalinaw ug kaluwasan sa mga komunidad.
Source: PRO7 PIO
I via Renante Socia Lada