Nakab-ot sa Police Regional Office 7 (PRO7) ang pinakadakong drug haul sa semana human madakpi ang usa ka ex-convict nga gituohang high-value drug suspect ug masakmit ang 2.6 ka kilo nga shabu nga nagkantidad og PHP 17.6 milyon.
Gipahigayon ang operasyon sa Provincial Intelligence Unit ug Provincial Drug Enforcement Unit sa Cebu Police Provincial Office (CPPO), kauban ang PDEA Regional Office, aron maputol ang pagpakatap sa ilegal nga drogas sa rehiyon.
Sa nasayran, gitago ang shabu sulod sa backpack ug plastic pack sa dihang gisakmit kini sa mga operatiba. Nahitabo ang operasyon sa alas 9:25 sa gabii niadtong Marso 6, 2025, sa Purok Sunrise 7 Borromeo, Barangay Pooc, Talisay City, Cebu.
Ang nadakpan nga 37-anyos nga lalaki, usa ka ex-convict mag-atubang og kasong may kalabutan sa Sections 5 ug 11 sa Republic Act 9165 o ang Comprehensive Dangerous Drugs Act of 2002.
Sa pagkakaron padayon ang PRO7 sa ilang kampanya batok sa ilegal nga drogas, uban ang pasalig nga palig-onon pa ang ilang operasyon aron masiguro ang kaluwasan sa rehiyon. (Renante Socia Lada)
(Source: PRO7)