Naluwas ang 78 ka menor de edad ug nadakpan ang lima ka indibidwal atol sa gipahigayon nga Oplan-Bulabog sa Cebu City Police Office (CCPO) sa gabii sa Marso 6, 2025.
Gipangunahan ni PCOL Enrico E. Figueroa, Acting City Director sa CCPO, ang operasyon sa mga lugar sa Barangay Luz, Kasambagan, Busay, Babag, ug kasikbit nga mga dapit. Sa 178 ka indibidwal nga nasusi, napamatud-an nga 78 kanila menor de edad ug gikinahanglan ang pagluwas. Ang lima ka nadakpan kasagarang nalambigit sa pag-inom sa publiko ug walay puy-ong pamatasan.
Lakip sa gihimong operasyon ang pag-inspeksyon sa 463 ka establisyemento, nga gipasiugdahan sa kapin 100 ka mga pulis nga nakig alayon sa mga barangay officials aron masiguro ang kahapsay ug kalinaw sa syudad.
Sumala ni PCOL Figueroa, kabahin ang Oplan-Bulabog sa estratehiya sa CCPO aron mapalig-on ang presensya sa kapulisan ug mapadali ang pagsumpo sa kriminalidad.
Kini nga operasyon usa ka suporta sa programa sa Police Regional Office 7 Regional Director PBGEN Redrico A. Maranan, nga nagtinguha sa mas paspas nga responde sa mga lugar nga daghan og krimen.
Ang CCPO nagpasalig sa padayon nga pagpatuman sa balaod ug pagpanalipod sa katawhan, sumala sa tumong sa Bagong Pilipinas nga mohatag ug mas luwas nga komunidad para sa tanan. (Renante Socia Lada)
(Source: CCPO)