Gipalig-on sa Police Regional Office 7 (PRO7) ang ilang operasyon batok sa kriminalidad gikan Enero 18 hangtod 24, 2026, nga naghatag og dakong resulta sa tibuok Central Visayas subay sa PNP Focus Agenda, ilabi na sa Enhanced Managing Police Operations.
Sulod sa usa ka semana, 331 ka police operations ang gihimo sa PRO7. Tungod niini, nasakmit ang iligal nga drogas nga nagkantidad og ₱5,987,604, narekober ang 26 ka ilegdl nga pusil, ug 107 ka wanted persons ang nadakpan sa lain-laing lugar sa rehiyon.
Sa kampanya batok sa iligal nga drogas, 171 ka drug personalities ang nadakpan, lakip ang 2 ka high-value individuals ug 169 ka bag-ong nailhang drug suspects. Nasakmit usab ang 880.53 gramos sa shabu nga nagkantidad og kapin ₱5.9 milyon.
Matod ni PBGen Redrico A. Maranan, Regional Director sa PRO7, ang mga kalampusan resulta sa intelligence-driven operations, husto nga pagdeploy sa mga pulis, ug lig-on nga pagdumala sa operasyon.
Gipalig-on usab sa PRO7 ang manhunt operations nga mitultol sa pagdakop sa 107 ka wanted persons, diin 17 niini mga Most Wanted, lakip ang regional, provincial, city, ug municipal level.
Sa kampanya batok sa iligal nga armas, 27 ka operasyon ang gihimo nga misangpot sa pagdakop sa 16 ka indibidwal ug pagkasakmit sa 26 ka pusil, usa ka eksplosibo, ug 47 ka bala.
Misaka usab ang operasyon batok sa iligal nga sugal, diin 77 ka personalidad ang nadakpan. Kadaghanan sa kaso may kalabotan sa illegal numbers game, sabong, card games, ug hantak. ₱10,756 nga sugal ang narekober.
Sumala pa ni PBGen Maranan, magpadayon ang PRO7 sa hugot ug lig-on nga law enforcement operations aron masiguro ang kalinaw ug kaluwasan sa mga komunidad sa Central Visayas.
Source: PRO7 PIO
I via Renante Socia Lada
#rpndykccebu