Nagpasidaan ang Police Regional Office 7 (PRO7) sa publiko nga likayan ang pag-hoard o sobra nga pagtipig sa gasolina ug uban pang petroleum products.
Gisupurtahan usab sa PRO7 ang mga lakang sa Department of Energy (DOE) pinaagi sa Task Force on Energy Resiliency aron mapugngan ang ilegal nga pagtipig sa gasolina.
Matod sa PRO7, ang sobra nga pagtipig sa gasolina mahimong hinungdan sa dili patas nga pag-apod-apod sa suplay sa petroleum products ug mahimong magkamugna og artipisyal nga kakulang sa suplay sa komunidad.
Gipasidaan usab sa kapulisan nga ang hoarding ug ilegal nga pagbaligya sa fuel mahimong makalapas sa mga balaod sama sa Batas Pambansa Blg. 33 ug Presidential Decree No. 1865, nga nagtakda og silot batok sa profiteering ug uban pang ilegal nga kalihokan nga may kalabotan sa energy resources.
Gimando ni PBGen. Redrico A. Maranan, regional director sa PRO7, ang tanang police units sa Central Visayas nga makigtambayayong sa ubang ahensya sa gobyerno sa pagmonitor sa mga gasolinahan, transport operations ug storage facilities aron malikayan ang ilegal nga pagtipig sa fuel.
Gihangyo usab sa PRO7 ang publiko nga likayan ang panic buying ug mosalig lamang sa opisyal nga pahibalo sa gobyerno bahin sa kahimtang sa suplay sa gasolina. Nagpasalig ang kapulisan nga andam silang motabang sa pagpatuman sa balaod aron masiguro ang patas ug padayon nga suplay sa fuel sa komunidad.
Source: PRO7 PIO
I via Renante Socia Lada
#rpndykccebu