Aron mapalig-on ang ka-andam ug seguridad sa rehiyon human sa linog nga mihasol sa pipila ka bahin sa Central Visayas, ang Police Regional Office 7 (PRO7) miapil sa usa ka multi-sector press briefing kabahin sa earthquake response ug preparedness niadtong Oktubre 14, 2025.
Ang kalihokan gipasiugdahan sa Philippine Information Agency (PIA) Region 7 ug gi-host ni Ms. Fayette Riñen. Nagkahiusa dinhi ang mga opisyal sa gobyerno ug pribadong sektor aron hisgutan ang mga lakang ug panaghiusa sa pagpalig-on sa ka-andam sa rehiyon sa panahon sa kalamidad.
Sa maong briefing, si PBGEN Redrico A. Maranan, Regional Director sa PRO7, mipasabot sa iyang sugyot nga magtukod og disaster response routes aron mapadali ang trapiko ug paghatod sa tabang ngadto sa mga lugar nga apektado sa kalamidad. Gisuportahan usab niya ang ideya nga maghimo og resolusyon o mando gikan sa Office of Civil Defense (OCD) o sa National Disaster Risk Reduction and Management Council (NDRRMC) aron ma-institutionalize kini nga mga ruta.
Gipasigarbo usab ni PBGEN Maranan nga andam kaayo ang PRO7 Search and Rescue (SAR) teams tungod sa ilang regular nga training ug earthquake drills. Gipasabot niya nga kada kalamidad usa ka oportunidad aron makat-on ug mapaayo pa ang sistema sa pagresponde.
Matod pa niya, ang PNP kanunay andam nga molihok ug motabang. Sila ang una nga motubag ug ang katapusan nga molakaw kung adunay kalamidad.
Gipasalig usab ni Maranan nga magpadayon ang lig-on nga panaghiusa tali sa mga ahensya sa gobyerno, LGUs, pribadong sektor, ug media. Ang ilang tinguha mao ang usa ka klaro nga komunikasyon ug hiniusang aksyon aron mas daghan pa ang maluwas nga kinabuhi.
Source: PRO7- PIO
I via Renante Socia Lada