Gipadayon sa Police Regional Office 7 (PRO7) ang ilang paningkamot nga mahimong lig-on ug andam nga pwersa sa pagresponde sa kalamidad, tinguha niini na makumpleto ang 5-Day Disaster Preparedness and Search, Rescue, and Retrieval (SRR) Operations Seminar sugod Nobyembre 17 hangtod 21, 2025 sa Camp Ceferino Genovia sa Sibonga, Cebu.
Ang maong kalihokan kabahin sa padayong inisyatiba sa PRO7 aron masiguro nga ang ilang mga personahe andam, hiniusa, ug maayo ang kahimtang sa pag-atubang sa emerhensiya ilabi na sa mga komunidad sa Central Visayas. Kapin 50 ka personahe, usa ka Police Commissioned Officer ug 49 ka Police Non-Commissioned Officers gikan sa lain-laing yunit ang mitambong sa hugot ug praktikal nga pagbansay.
Gipasiugdahan kini sa Regional Community Affairs Development Division (RCADD) ug Regional Special Training Unit 7 (RSTU7), diin ang mga partisipante nakaangkon og hands-on nga pagbansay pinaagi sa scenario-based exercises. Mga eksperto gikan sa PNP, Bureau of Fire Protection (BFP), ug Philippine Coast Guard (PCG) ang nagtudlo og advanced rappelling, high-angle rescue, firefighting, emergency survival, knot tying ug rescue rigging, chainsaw operations, first aid, CPR, ug water rescue gamiton ang rubber boats.
Tungod sa maong pagbansay, mas lig-on karon ang kapasidad sa PRO7 sa pagmobilize sa mga tawo ug kahimanan sa panahon sa krisis, subay sa direktiba sa Acting Chief, PNP nga palig-onon ang disaster preparedness ug Critical Incident Management Operational Procedures sa rehiyon.
Gipasiugda usab ni Regional Director PBGEN Redrico A. Maranan ang dakong kaimportante sa maong pagbansay.
Sa pagkakaron, 526 ka SRR-trained nga personahe sa PRO7 ang andam moresponde sa bisan unsang emerhensiya o kalamidad.
Pinaagi sa mga programa sama sa SRR Operations Seminar, gipakita sa PRO7 ang ilang kanunayng komitment nga mahimong kasaligan nga tabang alang sa mga Sugboanon ug tibuok Central Visayas nga ang mga pulis andam, abtik, ug nag-alagad kanunay aron makaluwas sa kinabuhi sa panahon sa kalisdanan.
Source: PRO7 PIO
I via Renante Socia Lada
