Gisugdan na sa Police Regional Office 7 (PRO7) ang ikaduhang batch sa Tulay sa Pagbabago (TUPA-Shepherding) Program, usa ka tawhanong programa nga nagpunting sa pagbag-o sa kaugalingon ug pagserbisyo nga may dignidad. Gipahigayon kini karong Agosto 8, 2025 sa PRO7 Headquarters, Camp Sergio Osmeña Sr., Cebu City.
Sa unang batch, 48 ka PNP personnel ang malampusong nakahuman sa training, samtang 30 ka pulis ang mosugod na sa ilang pagpanaw padulong sa personal ug propesyonal nga pagbag-o.
Matod ni PBGEN Redrico A. Maranan, Regional Director sa PRO7, dili lang seminar ang TUPA-Shepherding, kondili usa kini ka kalihukan nga puno sa paglaum, bag-ong pagsugod, ug pagbag-o sa kinaiya sa kapulisan.
Segon pa, ang tinood nga disiplina dili lang sukdon sa pagsunod sa balaod, pero makita kini sa kasingkasing nga andam motabang ug maggiya sa nangasayop.
Ang programa naglakip sa values re-orientation, spiritual guidance, wellness programs, ug mentorship aron lig-onon ang mga pulis nga nakasala sa una ug tabangan silang mobalik sa hustong dalan isip mga modelo ug tinuod nga alagad sa katawhan. Gipasabot usab nga ang tinuod nga liderato dili lang base sa ranggo, kondili sa integridad, pagkamapahiubsanon, ug abilidad sa paggiya sa uban.
Gipadayag ni PBGEN Maranan nga tumong sa PRO7 nga ipalapad ang programa sa tibuok rehiyon pinaagi sa pagtudlo og mga “shepherd-leaders” nga motabang sa pagmintinar sa disiplina nga adunay kasingkasing ug malasakit.
Nagpadayon ang PRO7 sa pagsalig nga posible ang pagbag-o, tinuod ang pagtubos, ug nga ang kapulisan nga may kasing-kasing na maoy yawi sa usa ka mas lig-on ug respetado nga institusyon.
Source: PRO7-PIO
I via Renante Socia Lada