Naigo ang Bogo City, Cebu sa 6.9 magnitude nga linog alas 9:59 sa gabii Setyembre 30, 2025, nga nagdala og daghang kadaut ug casualties, sumala sa Regional Disaster Risk Reduction and Management Council (RDRRMC) – Office of Civil Defense. Gisundan kini sa magnitude 2.1 nga aftershock sa Bogo City alas 2:34 sa kadlawon sa Oktubre 1, 2025.
Daghang tawo ang nasamdan ug pipila ang namatay sa Bogo City, San Remigio, Tabuelan, Medellin, Talisay, ug Daanbantayan, diin kadaghanan sa mga samdan minor ra. Padayon ang awtoridad sa pagtipon og datos samtang nagpadayon ang monitoring ug verification sa kahimtang.
Naapektuhan usab ang infrastruktura: unom (6) ka tulay ang dili na maagian, 1 sa Balamban, 1 sa San Remigio, 2 sa Medellin, ug 2 sa Daanbantayan. Usa ka dalan sa Sibonga ang naputol. Upat (4) ka building ang natumba, lakip ang tulo (3) sa Bogo City ug ang sports complex sa San Remigio. Naguba usab ang simbahan sa Daanbantayan ug pipila ka government buildings sa Tabuelan, Talisay, ug Daanbantayan.
Matod ni PBGen Redrico A. Maranan, Regional Director sa PRO7, ang search and rescue teams gi-deploy na aron motabang sa mga biktima ug komunidad. Gisiguro niya nga ang personnel sa ground nagpadayon sa rescue ug relief operations samtang nagkokoordinar sa disaster response agencies para sa paspas nga tabang. Ang publiko gihangyo nga magbantay ug sundon ang opisyal nga advisory alang sa seguridad.
Source: PRO7- PIO
I via Renante Socia Lada