Nagpadala na kagahapong adlawa, Nobyembre 4, 2025, ang Police Regional Office 7 (PRO7) sa ilang mga Search and Rescue (SAR) teams aron motabang sa mga lugar nga apektado sa bagyong Tino nga padayon nga miigo sa rehiyon sa Visayas.
Ang mga SAR teams gikan sa mga City ug Provincial Police Offices, lakip na ang mga Mobile Force Battalions, nagtinabangay uban sa ubang ahensya sa balaod ug disaster response aron motabang sa mga residente nga nanginahanglan og paspas nga tabang ug kaluwasan. Sa Cebu Police Provincial Office Grounds, gideploy usab ang dugang nga mga team paingon sa Amihanang Sugbo dala ang mga gamit pangluwas para sa mga lugar nga delikado sa baha ug baybayon.
Gisugo usab ang tanang city, provincial, ug mobile force units nga makigkoordinar sa ilang mga Local Government Units (LGUs) ug maghatag og tabang sa evacuation, trapiko, ug pagmintinar sa kalinaw ug kahapsay sa mga apektadong dapit. Ang mga sakop sa PRO7 nagtrabaho sa 24 oras aron maghimo og rescue, evacuation, ug road-clearing operations aron mabalik ang mga karsada ug mapasiguro ang kaluwasan sa mga evacuees ug responders.
Gidayeg ni PBGEN Redrico A. Maranan, Regional Director sa PRO7, ang kaisog ug pagpaningkamot sa mga pulis nga nag-atubang sa kalamidad.
“The PNP stands ready not only as protectors of peace, but as partners in saving lives and helping our communities recover,” segon ni PBGEN Maranan.
Gidugang niya nga ang PRO7 nagpabilin sa full alert status ug nagpadayon sa koordinasyon uban sa mga disaster councils aron masiguro ang paspas ug epektibong aksyon sa tibuok Central Visayas.
Source: PRO7 PIO
I via Renante Socia Lada