Police Regional Office 7 (PRO7) mipakita sa pinakabag-ong taho nga adunay dakong pagkunhod sa krimen sa Central Visayas, nga naabot og 33.23%. Kini matod pa, tungod sa mas lig-on nga pamaagi sa pagpangpatrolya sa kapulisan ug aktibong partisipasyon sa komunidad.
Sumala ni PBGen Redrico Maranan, Regional Director sa PRO7, dako ang natabang sa mga katawhan pinaagi sa ilang suporta sa mga programa sa kapulisan. Ang abli nga komunikasyon tali sa publiko ug awtoridad nakapalig-on sa ilang kakugi sa pagmintinar sa kahapsay ug kalinaw sa rehiyon.
Base sa datos gikan Enero hangtod Pebrero karong tuiga, naobserbahan ang pag ubos sa walo ka major crimesโgikan sa 626 nga kaso sa Enero ngadto sa 418 sa Pebrero, nga may kinatibuk-ang pagkunhod nga 208 ka kaso. Kadaghanan sa mga krimen nga kasagarang gitutokan, nagpakita nga miubos kini.
Gipasiugda ni PBGen Maranan ang padayon nga pagbantay ug pag-analisar sa pattern sa krimen aron mapadayon ang kahapsay.
Segon pa, ang mas gipakusgan nga checkpoint operations, police visibility, aktibong pagpangpatrolya, ug hugot nga law enforcement measures dako ang natabang sa pagpugong sa mga dautang elemento.
Gawas pa niini, nakita usab ang gamay nga pag-uswag sa crime solution efficiency, nga niabot na sa 90.98% karong tuiga kumpara sa 89.28% sa milabay nga tuig. Kini usa ka positibong kalambuan alang sa mas luwas nga rehiyon.
Gidayeg usab sa Regional Director ang kakugi sa mga police investigators sa PRO7 sa ilang paningkamot nga matumbok ang mga posibleng kriminal ug mapugngan ang mga dautang binuhatan sa rehiyon.
Dugang pa, ang aktibong partisipasyon sa katawhan ug koordinasyon sa uban pang law enforcement agencies dako ang natabang sa mas paspas nga pagsulbad sa mga kaso.
Ang publiko gidasig nga ipahibalo dayon sa awtoridad ang mga kadudahang lihok aron matabangan ang kapulisan sa pag-ila sa mga suspetsado ug mas mapalig-on ang seguridad sa Central Visayas. (Renante Socia Lada)
(Source: PRO7-PIO)