Gipahigayon sa Police Regional Office 7 o PRO7 ang usa ka Investigators’ Forum kabahin sa pagpanalipod sa kababayen-an ug kabataan isip kabahin sa pagsaulog sa National Women’s Month 2026. Ang kalihokan gihimo kagahapon Marso 16, 2026 didto sa Camp Sergio Osmeña Sr. sa Cebu City.
Gitambongan kini sa mga imbestigador ug kapulisan gikan sa nagkadaiyang unit sa Central Visayas aron mapalambo ang ilang kahibalo ug abilidad sa pag-atubang sa mga kaso nga may kalabutan sa pang-abuso sa kababayen-an ug kabataan, human trafficking, ug online sexual exploitation.
Usa sa mga resource speaker mao si Hon. Geraldine Faith A. Econg, Presiding Justice sa Sandiganbayan, nga naghatag og mensahe kabahin sa papel sa mga law enforcement sa pagpatuman sa hustisya pinaagi sa propesyonalismo ug pagsunod sa hustong proseso sa balaod.
Naghatag usab og mga lecture ang ubang opisyal sa kapulisan lakip na sila PCOL. Kimberly Molitas sa Regional Community Affairs and Development Division, PCAPT Aileen Marie Remedio sa Regional Anti-Cybercrime Unit 7, PCAPT. Galil Aiza Nacario nga mihisgot sa Child Policy sa PNP, ug Janette Rafter sa Women and Children Protection Center – Visayas Field Unit 7 nga naghisgot sa hustong proseso sa pag-atubang sa mga kaso sa trafficking ug online sexual abuse sa mga bata.
Sumala ni PBGEN. Redrico A. Maranan, Regional Director sa PRO7, importante nga padayon nga palig-onon ang kahibalo ug kahimtang sa mga imbestigador aron mas epektibo nilang maatubang ang mga krimen nga nakaapekto sa labing huyang nga sektor sa katilingban.
Matod pa niya, pinaagi sa maong kalihokan mapalig-on usab ang kooperasyon tali sa kapulisan, hudikatura ug uban pang ahensya aron masiguro nga ang mga biktima makadawat sa hustong proteksyon ug suporta samtang ginapangita ang hustisya.
Source: PRO7 PIO
I via Renante Socia Lada