Giandam na sa Police Regional Office 7 (PRO7) ang tanan aron masiguro ang kalinaw ug kasiguridad sa katawhan sa pag-obserbar sa Kalag-Kalag 2025.
Kapin sa 1,600 ka pulis ang ipakatap sa 364 ka sementeryo ug memorial parks ug 275 ka simbahan sa tibuok rehiyon aron magbantay, magtabang sa publiko, aron magpabilin ang kalinaw atol sa maong selebrasyon.
Ang PRO7 nakigkoordinar na usab sa mga lokal nga pangagamhanan, ubang security sectors, ug force multipliers aron mapalig-on ang joint security operations ug masiguro ang dali nga pagresponde sa bisan unsang insidente.
Sugod Oktubre 29, 2025, mopailawom ang PRO7 sa Heightened Alert Status aron andam ug kompleto ang tanang police personnel ug kagamitan alang sa paspas nga deployment kung adunay emerhensiya o kalihokan sa panahon sa Undas.
Sumala ni PBGEN Redrico A. Maranan, Regional Director sa PRO7, ang ilang security plan naglakip sa police visibility, trapiko, crowd control, ug koordinasyon sa lokal nga mga opisyal aron mapadayon ang hapsay nga kahimtang sa publiko.
Ang PRO7 magbantay usab sa mga terminal ug tourist destinations tungod sa gipaabot nga pagsaka sa biyahe sa mga tawo atol sa long weekend.
Giawhag sa kapulisan ang publiko nga magmatngon, makig-alayon sa mga awtoridad, ug mopahibalo dayon sa labing duol nga estasyon sa pulis kon adunay makita nga mga kadudahang kalihokan.
Source: PRO7- PIO
I via Renante Socia Lada