Ang Loon Municipal Police Station ilalom sa Bohol Police Provincial Office (PPO) gidayeg ug gihatagan og pasidungog isip Best Municipal Police Station (Class B) sa tibuok nasud atol sa PNP Day 2026 nga gihimo niadtong Enero 29, 2026 sa PNP Multi-Purpose Center, Camp Crame, Quezon City. Ang tema sa selebrasyon mao ang “Serbisyong Nararamdaman, Kapulisang Maasahan.”
Ang award gidawat ni Police Captain Thomas Zen Cheung, Chief of Police sa Loon Municipal Police Station. Mitambong usab sa seremonya sila Executive Secretary Ralph G. Recto, DILG Secretary Juanito Victor Remulla, ug PNP Chief PGen Jose Melencio Nartatez Jr., nga nagpasidungog sa mga labing maayo nga police units sa nasud.
Sumala ni PRO7 Regional Director PBGen Redrico A. Maranan, dakong garbo para sa rehiyon ang kalampusan sa Loon PNP. Matud pa niya, kini nagpakita sa disiplina, propesyonalismo, ug dedikasyon sa mga pulis sa maong estasyon.
“This national recognition is a testament to the dedication and exemplary service of the Loon Municipal Police Station. Their unwavering commitment to effective, high-quality policing sets a benchmark for other stations nationwide. Congratulations!” segon ni PBGen Maranan.
Gipasiugda usab nga ang award nagpakita sa maayong operasyon sa kapulisan, duol nga pakig-alayon sa komunidad, ug epektibong pagpatuman sa balaod. Kini usab usa ka ehemplo sa disiplina ug taas nga kalidad sa serbisyo sa kapulisan.
Dugang pa ni PBGen Maranan, dako usab ang papel sa lokal nga kagamhanan sa Loon sa pagsuporta sa kampanya batok sa kriminalidad. Ang kalampusan sa Loon PNP nagpakita nga ang Central Visayas makahimo sa pagpadayon sa taas nga sumbanan sa kapulisan ug maayong relasyon sa komunidad, nga makapadasig sa ubang police units sa probinsya ug sa tibuok nasud.
Source: PRO7 PIO
I via Renante Socia Lada