Malampuson ug malinawon nga natapos ang Sinulog Festival 2026 niadtong Enero 18, 2026, human ipatuman sa Police Regional Office 7 (PRO7) ang usa ka hugot ug kumpletong security plan. Tungod niini, nasiguro ang kalinaw ug kahapsay sa 461st Fiesta Señor sa tibuok Central Visayas.
Gipasalamatan ni PBGen Redrico A. Maranan, Regional Director sa PRO7 ug Head sa Task Force Fiesta Señor, ang tanang kapulisan, partner agencies, ug volunteers nga mitabang sa seguridad ug emerhensiya. Matud pa niya, walay dagkong insidente nga nahitabo atol sa tibuok selebrasyon, nga nagpamatuod nga epektibo ang ilang giandam nga plano sa seguridad.
Matod ni PBGen Maranan, malinawon ug hapsay ang Sinulog Grand Mardi Gras ug uban pang kalihokan tungod sa maayong pagplano, kusog nga police visibility, tabang sa partner agencies, ug kooperasyon sa katawhan.
Kapin 8,000 ka security personnel ang gi-deploy sa PRO7, lakip ang PNP, AFP, BFP, NAVFORCEN, BJMP, NICA, force multipliers, criminology interns, student volunteers, ug uban pang kaabag sa seguridad.
Nakatabang kini sa pagpanalipod sa kapin 3 milyones ka deboto ug nanan-aw.
Usa usab sa gipasiugda ni PBGen Maranan mao ang unang paggamit sa Mobile Command Vehicle sa PRO7, nga nagsilbi nga mobile command center. Kini nakatabang sa mas paspas nga koordinasyon, real-time monitoring, ug dali nga pagtubag sa mga sitwasyon atol sa pista.
Gigamit usab ang CCTV nga live feed, intelligence operations, ug hugot nga koordinasyon sa nagkalain-laing ahensya aron mamaayo ang crowd control, komunikasyon, ug pagdumala sa trapiko.
Gipasalamatan usab sa PRO7 ang Cebu City Government, Provincial Government of Cebu, Basilica Minore del Santo Niño, ug ang tanang deboto ug partner agencies sa ilang suporta ug kooperasyon.
Matod pa ni PBGen Maranan, ang kalampusan sa Sinulog 2026 nagpaila sa kusog nga panaghiusa, disiplina, ug tinabangay sa tanang sektor aron masiguro ang kalinaw ug kaluwasan sa dakong kalihokan.
Padayon ang PRO7 sa ilang pasalig nga maghatag og lig-on ug aktibong seguridad sa tanang dagkong kalihokan sa Central Visayas.
Source: PRO7 PIO
I via Renante Socia Lada