Nihaom ang tuig 2025 nga dako og kalampusan ang Police Regional Office 7 (PRO7) sa pakigbatok sa krimen sa Central Visayas. Tungod sa ilang padayon ug hugot nga operasyon, mas nahimong luwas ang mga komunidad ug daghang kriminal nga grupo ang nabungkag.
Gikan Enero hangtod Disyembre 2025, nakahimo ang PRO7 og 8,244 ka anti-illegal drug operations. Sa maong mga operasyon, 9,568 ka suspek ang nadakpan lakip ang 410 ka high-value target, ug nakasakmit og iligal nga drogas nga nagkantidad og hapit ₱890 milyones. Tungod niini, dako kaayong kadaut ang nahimo sa mga sindikato sa drogas sa rehiyon.
Gipunting usab sa PRO7 ang pagtangtang sa mga armas nga hulga sa katawhan. 3,241 ka dili lisensyado nga pusil ang nakumpiskar, lakip ang 774 ka pusil nga boluntaryong gihatag pinaagi sa Oplan Katok. Nakuha usab sa kapulisan ang 93 ka eksplosibo ug 5,900 ka bala, nga nakapugong sa posibleng paggamit niini sa krimen.
Sa ubang operasyon, 1,300 ka personalidad nga nalambigit sa lain-laing iligal nga kalihokan ang nadakpan. Sa kampanya kontra ilegal nga sugal, 4,220 ka personalidad ang nasikop sa 2,743 ka operasyon, ug ₱620,338 nga bet money ang nakumpiska.
Padayon usab ang manhunt operations sa PRO7 nga miresulta sa pagdakop sa 5,687 ka wanted persons, lakip ang 1,032 ka Most Wanted Persons, aron matubag ang hustisya ug mas maluwas ang komunidad.
Tungod sa kini sa tanang paningkamot, niubos og 28.18% ang krimen sa walo ka focus crimes o tumbas sa 942 ka insidente nga nakuhaan kumpara sa 2024. Dako ang pagkunhod sa kawat, tulis, pisikal nga kadaut, rape, ug pagpatay, lakip na usab ang carnapping sa sakyanan ug motorsiklo.
Matod pa ni PBGEN Redrico A. Maranan, Regional Director sa PRO7, ang kalampusan sa 2025 resulta sa hugot nga policing, maayong pagdumala, ug kooperasyon sa katawhan. Dugang niya, ipadayon sa PRO7 ang ilang mga programa aron masiguro nga magpabiling luwas ug malinawon ang Central Visayas.
Source: PRO7 PIO
I via Renante Socia Lada