Gipahigayon karong adlawa sa Police Regional Office (PRO-7) ubos sa pagdumala ni Regional Director PBGEN Redrico A. Maranan ang Heroes’ Welcome Ceremony sa Camp Arcadio Maxilom, Sudlon, Lahug, Cebu City. Ang seremonya usa ka pasidungog alang sa mga sakop sa kapulisan nga mitabang sa pagluwas ug pagtabang sa mga biktima sa magnitude 6.9 nga linog nga miigo sa amihanang bahin sa Sugbo niaging semana.
Gipasidunggan sa PRO7 ang mga miyembro sa Search, Rescue, ug Retrieval (SRR) teams nga mibalik na sa ilang tagsa-tagsa ka unit aron magpadayon sa ilang regular nga serbisyo sa kalinaw ug seguridad. Bisan pa sa ilang pagbalik, padayon gihapon ang mga operasyon sa tabang ug rehabilitasyon sa mga lugar nga apektado sa linog.
Sa iyang mensahe, si PBGEN Maranan mipasabot sa iyang dako nga pagpasalamat sa kaisog ug sakripisyo sa mga pulis nga walay pagduha-duha nga mitabang sa panahon sa kalamidad. Iyang gidateg usab ang Regional Staff sa maayong koordinasyon ug epektibong pagdumala sa operasyon atol sa emerhensiya.
“As the President himself said, ‘Napakabilis nang responde ng Probinsya ng Cebu’, and for that, I take my hat off and give my snappiest salute to Governor Pamela Baricuatro for orchestrating a very effective, responsive, and efficient disaster response,” segon ni PBGEN Maranan.
Gihisgutan usab sa opisyal ang pagbisita ni Pangulo Ferdinand R. Marcos Jr. sa lalawigan, diin iyang gidayeg ang paspas ug han-ay nga pagtubag sa Cebu atol sa krisis.
Usa sa mga bahin sa kalihokan mao ang paghatag og Medalya ng Pagtulong sa Nasalanta (PNP Disaster Relief and Rehabilitation Medal) sa mga opisyal ug contingents sa Cebu Police Provincial Office (CPPO) nga gipangulohan ni PCOL Abubakar U. Mangelen Jr. Tungod kini sa ilang aktibong partisipasyon sa pag-monitor, pagluwas, ug paghatag og hinabang uban sa lokal nga mga opisyal ug sa Incident Command Post sa Bogo City.
Ang Heroes’ Welcome Ceremony usa ka pahinumdom nga sa taliwala sa katalagman, magpadayon ang PRO7 sa pagserbisyo uban sa kaisog, pagtinabangay, ug kadasig.
“Together, we will continue to rise and rebuild, because in the heart of every disaster, the Filipino spirit always prevails,” panapos ni PBGEN Maranan.
Source: PRO7- PIO
I via Renante Socia Lada