Aron mapalig-on ang ka-andam sa kalamidad ug seguridad sa komunidad, ang Police Regional Office 7 (PRO7) nangulo sa usa ka clearing ug paneling operation sa Villa del Rio Subdivision 1, Barangay Bacayan, Cebu City.
Ang kalihokan kabahin sa padayon nga inisyatiba sa PRO7 nga magpasiugda sa post-typhoon response human sa kadaut nga gidala sa mga bagyong Tino ug Uwan. Tumong sa operasyon nga masiguro nga walay mabilin nga mga delikadong estruktura nga makapahamtang og peligro sa mga residente ug aron masuportahan ang pagbangon sa lugar.
Apil sa joint team ang mga personahe sa Cebu City Police Office (CCPO) ubos sa pagdumala ni PCOL Enrico E. Figueroa, Police Station 8 (PS8) nga gihawiran ni PCPT Wilmer M. Castillo, ang Regional EOD K9 Unit 7 ubos ni PCPT Alfredo Rago Jr., ug ang Philippine Coast Guard (PCG) 7 nga gipangulohan ni PO3 Brando Palacio. Nakigtambayayong usab sila sa Villa del Rio Subdivision Homeowners Association nga gi-representahan ni Atty. Dante Jadman ug Mrs. Diane Oliver.
Sa iyang mensahe, gipadayag ni PBGEN Redrico A. Maranan, Regional Director sa PRO7, nga ang matag operasyon nga ilang gihimo simbolo sa ilang panumpa sa pagpanalipod sa kinabuhi ug tabang sa komunidad nga makabangon pag-usab.
Gidayeg usab ni PBGEN Maranan ang tanang yunit nga misalmot sa paspas ug hiniusang aksyon, ug iyang giangkon nga magpadayon ang PRO7 sa pagpalig-on sa disaster readiness aron masiguro ang kaluwasan sa mga komunidad sa tibuok Central Visayas.
Source: PRO7 PIO
I via Renante Socia Lada