Gipakusog sa Police Regional Office 7 (PRO7) ang ilang kampanya batok sa iligal nga drogas human makuha ang ₱2.72 milyones nga kantidad sa iligal nga drogas atol sa drug bust operation alas 3:20 sa kadlawon niadtong Enero 11, 2026 sa Sitio Miñulida, Barangay Calamba, Cebu City.
Ang operasyon gihimo sa Police Station 6 sa Cebu City Police Office (CCPO) isip kabahin sa hugot nga direktiba sa Philippine National Police sa Enhanced Managing Police Operations (EMPO) ug sa padayong kampanya sa PRO7 batok sa drogas.
Atol sa operasyon, nasikop si alias “Estoy,” 22 anyos, nga giila isip high-value drug suspect, uban ang iyang babae nga kauban, 49 anyos, nga giila isip street-level individual.
Nakuha sa kapulisan ang daghang sachet nga adunay puti nga kristal nga substansiya nga gituohang iligal nga drogas. Ang kinatibuk-ang timbang niini gibanabanaang 400 gramos nga adunay street value nga ₱2,720,000. Apil usab sa nakuha nga ebidensya ang buy-bust money ug eco bag nga gigamit sa pagdala sa drogas.
Ang mga nakuhang substansiya gipadala sa Regional Forensic Unit 7 alang sa laboratory examination. Samtang, ang mga suspetsado temporaryong gibilanggo sa custodial facility sa PS6, CCPO, samtang giandam ang mga dokumento para sa pagpasaka sa kaso tungod sa paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002.
Matod ni PBGen Redrico A. Maranan, Regional Director sa PRO7, nagpakita kini nga operasyon sa lig-on nga paningkamot sa PRO7 sa pagbungkag sa mga sindikato sa drogas ug sa pagpanalipod sa komunidad. Giawhag usab niya ang publiko nga magmatngon ug motaho dayon kon adunay kadudahang kalihokan aron matabangan ang awtoridad sa paghimo og mas luwas ug drug-free nga mga komunidad sa Central Visayas.
Source: PRO7 PIO
I via Renante Socia Lada