Gilusad karong adlawa sa Police Regional Office 7 (PRO7) ang usa ka inobatibong programa nga gitawag Community Assistance, Safety, and Support Network (CASSN) sa Camp Sergio Osmeña Sr., Cebu City. Ang maong inisyatiba gitumong sa pagpalig-on sa panaghiusa ug pagsalig tali sa kapulisan ug sa lain-laing komunidad sa Central Visayas, ilabi na ang mga Filipino-Chinese ug langyaw nga residente.
Gipangulohan ni PBGen Redrico A. Maranan, Regional Director sa PRO7, ang paglusad uban sa dagkong personahe sa gobyerno ug pribadong sektor. Apil sa mitambong mao sila Mr. Francis Dy sa Cebu Chamber of Commerce and Industry, mga opisyal sa Filipino-Chinese Chamber, Mr. Ward Martein sa Cebu Foreign National Keepers Network, ug mga representante sa AFP, DILG, DOJ, NBI, DOT, ug Bureau of Immigration.
Matod ni PBGen Maranan, ang CASSN simbolo sa bag-ong pamaagi sa pagpangga sa katawhan pinaagi sa kooperasyon sa lokal nga kagamhanan, negosyo, ug mga sibilyan.
Ang CASSN nagtanyag og inclusive ug network-based policing, diin gilakip ang tanang sektor sa pagpatuman sa kalinaw ug seguridad. Gibutyag usab ni PBGen Maranan nga importante ang papel sa lokal ug langyaw nga mamumuhunan sa kalamboan sa rehiyon ug pasalig sa PRO7 sa usa ka luwas ug business-friendly nga palibot.
Giila usab niya ang kauban nga ahensya sa gobyerno sa ilang tabang ug kaalam, nga nakahatag og lig-on nga pundasyon sa bag-ong modelo sa policing nga puno sa kaluoy, kahibalo, ug aktibong suporta sa komunidad.
Pinasikad sa liderato ni PNP Chief PGen Nicolas Torre III, gipasalig ni PBGen Maranan ang katungdanan sa PRO7.
Ang CASSN usa ka dako ug makasaysayanong lakang sa PRO7 alang sa komunidad-based policing, nga nagpunting sa transparency, inclusivity ug pagsalig.
Source: PRO7
I via Renante Socia Lada
#rpndykccebu
#675hzamband
#tandemexpress