Gipalihok na sa Police Regional Office 7 (PRO7) ang tanang kahinguhaan ug gibutang sa heightened alert ang tanang police units isip pagpangandam sa posibleng epekto sa Tropical Storm Basyang, nga gitawag usab og Penha sa international name, nga gilauman makaapekto sa Central Visayas.
Sumala sa pinakabag-ong weather bulletin sa PAGASA niadtong Pebrero 5, 2026, gipataas na sa Signal No. 2 ang pipila ka lugar lakip ang Bohol, Cebu, Siquijor, Negros Island, ug uban pang probinsya sa Kabisay-an ug Mindanao.
Tungod niini, posibleng adunay kusog nga hangin, kusog nga ulan, baha, landslide, ug peligroso nga dagat.
Isip tubag, giihap ug giandam sa PRO7 ang ilang mga personnel, sakyanan sa yuta ug dagat, rescue equipment, komunikasyon, ug uban pang gamit alang sa emerhensiya.
Ang Reactionary Standby Support Force ug uban pang police units andam nga i-deploy dayon kung gikinahanglan.
Gimanduan usab ang tanang Provincial ug City Police Offices nga makig-coordinate sa local government units (LGUs), DRRMCs, ug partner agencies.
Lakip sa buluhaton sa kapulisan ang 24/7 monitoring, pre-emptive deployment sa mga delikadong lugar, tabang sa evacuation, traffic management, ug pagpanalipod sa mga dalan ug importanteng pasilidad.
Matod ni PBGEN Redrico A. Maranan, Regional Director sa PRO7, andam ang kapulisan sa pagtabang sa katawhan. Giawhag niya ang publiko nga magbantay, maminaw sa opisyal nga pahibalo, ug makigtambayayong sa mga otoridad aron masiguro ang kaluwasan sa tanan.
Gidasig usab ang katawhan nga kanunay mag-update pinaagi sa opisyal nga PAGASA bulletins ug pahibalo sa lokal nga pangagamhanan, ug moduol dayon sa pinakaduol nga police station o emergency hotline kung gikinahanglan.
Source: PRO7 PIO
I via Renante Socia Lada