Sa dakong lakang sa pagpausbaw sa kaluwasan ug seguridad sa Central Visayas, gipakusgan sa Police Regional Office 7 ang ilang anti-criminality operations.
Kini nga proactive nga pamaagi malampuson nga nisangpot sa pagkasakmit sa P6.5 milyones nga kantidad sa ilegal nga drugas, uban sa pagkasikop sa 254 ka mga indibidwal nga nalambigit sa kriminal nga mga kalihokan.
Si PBGEN ANTHONY ABERIN, ang Regional Director sa PRO-7, niingon nga ang dungan nga operasyon sa kapulisan usa ka mahinungdanong paningkamot sa atong kampanya batok sa ilegal nga drugas, ilegal nga sugal, ug uban pang lain-laing matang sa kriminal nga kalihokan sa Central Visayas.
“These actions highlight a firm commitment to creating a safer community and reinforcing the message that illegal activities will not be tolerated. Through these efforts, PRO-7 aims to foster a safer environment for the people of Central Visayas,” segon PBGen Aberin.
Gikan sa Nobyembre 4 hangtod 6, 2024, ang mga taho nagpakita nga ang PRO-7 nakadakop sa 10 sa mga most wanted person uban sa 66 ka laing mga indibidwal. Narekober usab sa mga otoridad ang 74 ka mga armas ug usa ka eksplosibo, hinungdan sa pagkasikop sa dugang 7 ka mga indibidwal.
Dugang pa, nikabat sa 99 ka mga dinakpan ang nasikop may kalabotan sa ilegal nga drugas nga niresulta sa pagkakumpiska sa 970.08 gramos nga nagkantidad ug Php6,596,544.00 uban sa 103.95 gramos nga marijuana nga nagkantidad ug Php12,474.00.
Sa kalambigit nga pagsumpo sa illegal nga sugal, 72 ang nasikop, diin nasakmit ang mga gambling paraphernalia ug cash nga mokabat sa PhP8,681.00.
Ang tanan nga mga dinakpan anaa karon sa kustodiya sa pulisya, ug ang mga dokumento giandam alang sa pagpasaka og mga kaso sa korte. (Renante Socia Lada and Ting Joe Pepito)
(Source: PRO-7-PIO)