Nasakmit sa mga operatiba sa Police Regional Office 7 (PRO-7) ang iligal nga drogas nga nagkantidad og PHP51 milyon atol sa usa ka anti-drug operation niadtong Disyembre 13, 2024. Ang operasyon gipahigayon sa Barangay Mambaling, Cebu City, ug nagresulta usab sa pagkadakop sa usa ka 57-anyos nga high-profile drug courier.
Ang suspetsado mao si Jonathan Ungria Pastidio, alias “Jotex,” taga Avocado street, Brgy. Mambaling dakbayan sa Sugbo.
Si Pastidio gihulagway sa kapulisan nga maoy nagdumala sa distribusyon sa iligal nga drogas sa Cebu City ug kasikbit nga mga lugar. Base sa imbestigasyon, kaya niyang magtransportar og 5 ngadto sa 10 ka kilo matag bulan.
Pinangulohan kini sa RPDEU7, kauban ang PDEA Special Operations Unit 7 ug Mambaling Police Station.
Nakumpiskar ang 7.5 kilos sa iligal nga droga, buy-bust money, usa ka backpack, ug paper bag nga naglangkob sa mga tinaguan nga drogas.
Gipasabot ni PBGen Roy B. Parena, Officer-In-Charge sa PRO7, nga kini usa ka dako nga kadaugan sa ilang kampanya kontra drogas.
“Kini nga operasyon nagpamatuod sa among dedikasyon sa pagsiguro sa seguridad sa publiko, ilabi na samtang nagkadool ang Pasko,” matod niya.
Gipasalig usab ni PBGen Parena ang dugang kalig-on sa border monitoring, intelligence operations, ug pakigtambayayong sa PDEA aron mapakusgan ang mga programa kontra drogas.
Ang suspetsado anaa na sa kustodiya sa PRO-7 ug giatubang ang kaso alang sa Sections 5 ug 11 sa Republic Act 9165 o ang Comprehensive Dangerous Drugs Act of 2002.
Padayon ang pagpatuman sa hustisya alang sa usa ka luwas nga Central Visayas. (Renante Socia Lada)
(Source: PRO-7)