Kapin sa P100 milyones nga balor sa mga kaktangan ang naaabo human niulbo ang sunog sa poultry farm sa Brgy. Maslog, dakbayan sa Danao sa amihanang bahin sa Sugbo niadtong Sabado sa buntag, Oktubre 26.
Mokabat sa 46,000 ka manok ang nangamatay sa dakong sunog nga nagsugod pagka alas 3:00 sa kaadlawon.
Si Fire Officer 2 (FO2) Christian Balio sa Danao City Fire Office niingon nga usa ka security guard nga nag-roving sa palibot sa umahan maoy nakabantay sa kayo.
Segon sa gwardiya nga nakakita sa kalayo nga nagsugod ang sunog didto sa nahimutangan sa mga blower.
Ang mga blower gigamit sa paghatag ug bentilasyon ug pagmentinar sa usa ka lebel sa temperatura sa dapit diin gibutang ang mga manok.
Matod ni Balio nga gipukaw dayon sa security guard ang laing duha ka mga trabahante sa umahan nga didto nangatulog sulod sa control room.
Mga alas 3:45 sa kaadlawon niabot ang kabomberohan sa maong umahan ug nakontrolar nila ang kalayo alas 5 sa buntag una kini hingpit nga napalong alas 5:35 sa buntag
Mokabat sa P101,325,000 ang danyos sa sunog sa poultry farm.
Matod ni Balio nga 46,000 ka manok ang napatay sa sunog. Maayo na lang kay walay usa sa mga trabahante ang naangol.
Sa pagkakaron padayong gisusi sa mga imbestigador sa kabomberohan sa dakbayan sa Danao ang hinungdan sa maong sunog.
Matod ni Balio nga ilang gikonsiderar ang posibilidad nga electrical overheating ang hinungdan sa sunog. (Renante Lada)