Gidakop sa kapulisan sa Bohol ang usa ka High-Value Individual (HVI) ug iyang kauban sa usa ka anti-illegal drugs operation nga nahitabo alas gabii sa Enero 6, 2026, sa Purok 2, Barangay Dampas, Tagbilaran City. Sa operasyon, nasakmit ang kapin ₱69.9 milyones nga balor sa gituohang shabu.
Ang operasyon gipangulohan sa Provincial Intelligence Unit ug Provincial Drug Enforcement Unit (PIU/PDEU) sa Bohol Police Provincial Office, ubos sa pagdumala ni PLTCOL Joemar S. Pomarejos, ug sa direktang mando ni PCOL Patricio C. Degay Jr., Provincial Director, uban sa tabang sa Tagbilaran City Police Station.
Ang nadakpan mao ang 39 anyos nga lalaki, usa ka drayber ug residente sa Barangay Canmanico, Valencia, Bohol, nga giila isip HVI, ug iyang 47 anyos nga kauban nga babaye nga taga Muntinlupa City. Nasakmit gikan kanila ang 10,285.6 gramos sa gituohang shabu, usa ka cellphone, buy-bust money, itom nga eco bag nga sudlanan sa drogas, ug usa ka puti nga Isuzu MU-X nga gituohang gigamit sa pagdala sa iligal nga drogas.
Ang duha ka suspek karon anaa na sa kustodiya sa Tagbilaran City Police Station, samtang ang mga nasakmit nga ebidensya gihatod na sa Provincial Forensic Unit para sa laboratory examination. Andam na usab ang kapulisan sa pagpasaka og kaso batok kanila tungod sa paglapas sa Sections 5 ug 11 sa RA 9165 o Comprehensive Dangerous Drugs Act of 2002.
Gipasalamatan ni PCOL Degay Jr. ang mga kapulisan nga misalmot sa operasyon ug gipasalig sa katawhan nga magpadayon ang PNP Bohol sa ilang hugot nga kampanya batok sa iligal nga drogas alang sa mas luwas ug malinawon nga Bohol.
Source: PNP Bohol
I via Renante Socia Lada