Pasakaan og mga kaso sa Cebu City Police Office (CCPO) ang mga tao nga nagpadagan sa usa ka ilad nga investment website nga nisikat sa social media tungod sa mga viral videos niini.
Pinaagi sa padayon nga pagsusi ug lawom nga imbestigasyon sa CCPO ug sa Police Regional Office 7 (PRO-7), nakit-an na ang mga personalidad nga nalambigit sa maong scam. Andam na karon ang mga otoridad sa pagpasaka og pormal nga kaso batok sa mga suspetsado.
Dungan niini, ang Cebu City Business Permit and Licensing Office mipagawas na og show cause order batok sa tagdumala sa website, nga gihatagan og 72 ka oras aron motubag sa mga kalapasan sa regulasyon.
Si PBGEN Redrico A. Maranan, Regional Director sa PRO-7, misiguro sa katawhan nga ipatuman ang hustisya ug patubagon ang mga scammers aron maprotektahan ang mga nabiktima ug mapadayon ang pagsalig sa kapulisan.
Gihangyo usab ni PCOL Enrico E. Figueroa, ang Acting City Director sa CCPO, ang tanan nga posibleng nabiktima sa scam nga motaho sa ilang kasinatian.
Nagpabiling determinado ang CCPO sa pagpanalipod sa katawhan batok sa krimen ug pagsiguro sa kalinaw ug kahapsay sa dakbayan.
Source: CCPO
I via Renante Socia Lada