Si Pangulong Ferdinand R. Marcos Jr. moanhi sa Sugbo karong adlawa Enero 30, 2025, alang sa iyang unang opisyal nga pagbisita sa lalawigan karong tuiga.
Sa maong pagbisita, tambongan sa Pangulo ang upat ka dagkong aktibidad sa Cebu City ug Lapu-Lapu City, nga naglakip sa mga tigum sa rehiyonal nga kalambuan, pagpundok sa mga abogado, ug inagurasyon sa usa ka importante nga imprastraktura sa transportasyon.
Ang unang aktibidad ni Pangulong Marcos mao ang pagtambong sa miting sa RDC-7, diin hisgutan ang mga prayoridad nga proyekto sa administrasyon ug mga infrastructure flagship projects sa rehiyon.
Ang National Economic Development Authority (NEDA) mopresentar sa mga hagit sa rehiyonal nga kalambuan ug ang mga posibleng interbensyon sa gobyerno.
Human sa RDC meeting, mangulo si Pangulong Marcos Jr. sa 20th National Convention of Lawyers nga gipasiugdahan sa Integrated Bar of the Philippines (IBP).
Ang maong kalihukan pagatambongan sa hapit 4,000 ka IBP-registered nga mga abogado nga naglangkob sa nagkadaiyang probinsya sa nasod.
Moadto usab ang Pangulo sa Cebu Provincial Capitol alang sa usa ka luncheon miting uban sa mga gobernador ug bise gobernador sa mga probinsya sa Visayas.
Kini nga pagpundok gipangulohan sa Cebu Provincial Government ug gitumong aron hisgutan ang mga isyu ug programa alang sa rehiyon.
Ang kataposang aktibidad sa Pangulo mao ang pormal nga pag-abli sa alternate runway sa MCIA Terminal 2 sa Lapu-Lapu City.
Gilauman nga kini makatabang sa pagsulbad sa pagkadaghan sa air traffic, pasahero, ug cargo volume sa MCIA. Ang runway usab makatabang sa padayon nga operasyon sa airport sa panahon sa emerhensya ug runway closures.
Kini ang unang pagbisita ni Pangulong Marcos sa Cebu karong tuiga, human sa iyang kataposang pag-anhi niadtong Hulyo 9, 2024, diin iyang giablihan ang 64th Palarong Pambansa sa Cebu City Sports Center ug giinagurahan ang SteelAsia Manufacturing Corporation steel plant sa Compostela, Cebu.
Ang maong pagbisita nagpakita sa padayong suporta sa administrasyon alang sa kalambuan sa rehiyon, pinaagi sa mga dagkong proyekto ug inisyatiba nga makapauswag sa ekonomiya ug imprastraktura sa Cebu ug sa tibuok Central Visayas.
Source: PIA
I via Renante Socia Lada
#rpndykccebu
#675hzamband
#mrpublicservice