Wala kauli sa ilang pinuy-anan ang usa ka pasyenti human nakuhaan og pinakiting shabu.
Pasado alas 4:00 kagahapon sa hapon, Nobembre 7,2022 nadawat ang taho sa kapulisan sa Cebu City Police Office, Station 2, ang taho may labot sa usa ka pasyenti nga naay shabu, didto kini sa pangpublikong tambalanan sa dakbayan sa Sugbo.
Ang suspetsado giila nga usa ka Nilo, 26 anyos ang panuigon, taga Barangay Babag, Dakbayan sa Sugbo.
Segon sa Hepe sa Abella Police Station nga si Police Major Nolan Primacio Tagsip nga pinaagi sa tawag sa usa ka gwardya sa tambalanan ilang nasayran nga adunay pasyenti nga nakuhaan og duha ka pakiti sa shabu nga adunay timbang nga 1 gramo.
Sa nasayran mugawas na unta sa tambalanan ang suspetsado apan na deretso kini sa prisuhan human nahulog gikan sa iyang bulsa ang maong ginadiling drugas.
Sa pagkakaron gihimo pa ang dugang imbestigasyong kung nganong adunay shabu ang naasoy nga pasyenti. (Renante Lada, photo courtesy by Kon. Keith Noel KN Wenceslao)