Ang Regional Director sa Police Regional Office -7 nga si PBGEN Anthony Aberin nipahalipay sa Cebu City Police Office ug ubang police units nga nalambigit, lakip na ang ubang stakeholders sa kalinaw ug seguridad alang sa usa ka luwas nga Pasigarbo sa Sugbo 2024.
Malampusong natapos ang grand showdown mga pasado alas 4:00 sa kaadlawon niadtong Agosto 26, 2024 nga adunay kapin sa 16,000 ka mga tumatan-aw lakip na ang mga langyaw nga turista ug mga inilang personalidad nga tanan nakasaksi sa pasundayag sa 51 ka mga partisipanteng contingents gikan sa lain-laing mga lungsod ug siyudad sa lalawigan sa Sugbo.
Gitataw ni PBGen Aberin nga nihatag og dakong seguridad ang mga sakop sa PNP, PCG, BFP, NICA, ug uban pang mga stakeholder.
Gidayeg usab ang maayong pagkahan-ay sa pagpangadam sa event organizers nga nakatabang sa PRO-7 sa pagsiguro sa kaluwasan ug seguridad sa tanan.
Dugang pa niya nga nagbunga gyud ang paningkamot kay walay mga dagkong insidenti ug krimin ang natala hangtod na kini nahuman.
Sa nasayran ang Pasigarbo sa Sugbo gisalmutan sa 51 ka mga partisipanti nga gikan sa mga kalungsuran ug dakbayan sa probinsya sa Sugbo.
“Our success in securing high-profile events in the region manifests a highly favorable security landscape designed to show that Central Visayas is one of the safest areas in the country”, dugang ni PBGen Aberin. (Renante Socia Lada)
(Source: PRO-7)