Nanawagan ang Police Regional Office 7 (PRO7) sa mga indibidwal, grupo, ug organisasyon nga nagplano og mga assembly, rally, o pagtukod og asosasyon nga ihunong una ang ilang kalihokan samtang nagpadayon ang ASEAN Summit Tourism Forum 2026 sa Central Visayas.
Matod sa PRO7, girespeto gihapon nila ang katungod sa katawhan sa pagpadayag sa ilang opinyon, malinawong panagtigom, ug pag-apil sa mga organisasyon, sumala sa Konstitusyon. Apan gihangyo nila ang publiko nga sabton ang importansya sa maong internasyonal nga kalihokan, nga nagdala og dungog, oportunidad, ug dugayng kaayohan sa rehiyon ug sa tibuok nasod.
Gipasabot usab sa PRO7 nga ang malampusong pagdumala sa ASEAN Summit dili lang para sa Central Visayas kundili para sa tibuok Pilipinas, ilabi na kay daghang langyaw nga delegado ang motambong. Busa, importante ang kooperasyon sa tanan aron mapadayon ang kalinaw ug kahapsay.
Subay sa ilang mandato sa pagpanalipod sa kaluwasan sa publiko, kalinaw ug kahapsay, ug seguridad sa mga bisita ug lokal nga komunidad, nanawagan ang PRO7 sa pagpailob, pagtinabangay, ug pagrespeto sa usag usa atol niining mahinungdanong panahon.
Sa katapusan, gisiguro sa PRO7 nga magpadayon sila sa pagpanalipod sa demokratikong katungod sa katawhan, samtang gibalanse ang responsibilidad sa pagpanalipod sa interes sa nasod ug sa maayong imahe sa Pilipinas sa kalibutan.
Nanawagan sila sa tanan nga maghiusa aron masiguro ang luwas, malinawon, ug malampusong ASEAN Summit Tourism Forum 2026.
Source: PRO7 PIO
I via Renante Socia Lada