Gipahigayon karong adlawa ang final coordination meeting sa mga sakop sa security cluster sa Palarong Pambansa 2024.
Kini aron tataw gyud sa kada usa ang matag tahas ug tulomanon nga nasangon kanila, ilabi na sa opening ceremony sa Hulyo 9 ug sa closing ceremony sa Hulyo 16.
Matud Ni Harold Alcontin, labaw sa Cebu City Disaster Risk Reduction and Management Office (CCDRRMO), gawas sa 12,000 ka mga atleta gikan sa lainlaing mga dapit sa nasud, gipanagan-an sab nila ang duot sa mga tumatan-aw nga modagsa sa Cebu City Sports Center (CCSC).
“Sa opening pa lang daan naa tay mga moabot gyud more or less 15,000 to 20,000 ka tawo moari diri sa ABellana (CCSC). That’s why nagpa-brief gyud ta unya nagpa-clarify ta sa mga issues such as parking, exit asa sila paingon, kinsay mangari,” pulong niya.
Matud niya mausab ang ilang mga plano kabahin sa seguridad tungod sa presensiya sa Presidential Security Group, nga maoy mobantay nga luwas si Presidente Ferdinand Marcos, Jr. ug Bise Presidente Sara Duterte.
Gawas kanila, laing gipanagan-an nga mangabot ang mga kalihim sa mga departamento sa nasudnong pangagamhanan, mga senador, ug uban pa.
Hugot sab gyud nga seguridad ang ipatuman atol sa maong okasyon, kanus-a giingong mag-lockdown na, o walay makagawas ug makasulod, sa CCSC 30 minutos sa dili pa magsugod ang programa.
Sa laing bahin, giklaro ni Dr. Adolf Aguilar, Department of Education (DepEd)-Cebu City assistant schools division superintendent, nga walay bayad alang sa publiko ang pagsaksi sa opening ceremony ug sa closing ceremony.
Apan nipahimangno siya nga alang sa seguridad, nanghatag ang DepEd og ticket alang sa pagsulod sa CCSC apan 3,000 lang kini ka buok.
Awhag niya niadtong gustong makakuha sa ticket nga moadto sa buhatan sa DepEd aron magpalista. Sa mga nagtrabaho sa gobiyerno, sama sa Cebu City Hall, nga gustong mosaksi, kinahanglan mopadala og suwat-hangyo nga nasaysay sa ilang kaikag nga motan-aw sa seremonyas.
Laing gipahibawo atol sa tigom nga kay lagi adunay parada sa mga atleta sa dili pa ang opening ceremony, sirad-an ang mga dalan sa V. Rama, B. Rodriguez, sa may Fuente Osmeña Rotunda, ug sa Osmeña Blvd. alas 2 pa lang sa hapon. (PIO/Reypas)
(Source: Cebu City • News & Information)