Tungod sa usa ka semana nga undercover nga imbestigasyon sa kapulisan, nasakmit sa mga tinugyanan sa balaod ang ilegal nga drugas nga mobalor ngadto sa P6.1 milyones, didto sa dakbayan sa Talisay, niadtong Hulyo 26 sa gabii.
Ang maong buy-bust operasyon gihimo sa Drug Enforcement Unit sa Talisay City Police Station nga ni resulta sa pagkasikop sa 33-anyos nga babaye nga usa ka high-profile drug suspect, didto sa Sacred Heart Village sa Brgy, San Isidro, siyudad sa Talisay.
Sumala sa mga taho, ang suspek nalambigit sa mga kalihokan sa ilegal nga droga sukad pa sa pagsugod sa tuig, nga naglihok kauban sa iyang mga kauban.
Siya ang nagdumala sa mga remittance ug balanse, samtang ang iyang kauban maoy naghikay sa pag-apod-apod sa ilegal nga drugas.
Gipiyalan siya og 1 ngadto sa 2 ka kilo sa ilegal nga drugas, ug ang suspek makahimo sa pagdispatsar nga mokabat ngadto sa usa ka kilo sa shabu matag semana, nga naglangkob sa nagkadaiyang dapit sa dakbayan sa Talisay ug pipila ka bahin sa dakbayan sa Sugbo.
Subay sa taho gikan sa usa ka impormante kalabot sa illegal nga drugas, ang suspek gipaubos sa surveillance sulod sa usa ka semana sa wala pa nihimo og operasyon sa mga operatiba sa kapulisan nga niresulta sa pagkasikop niini.
Atol sa pagkasikop, nasakmit gikan sa suspek ang 900 gramos nga shabu nga adunay standard price value nga PhP6,120,000, lakip ang usa ka backpack, usa ka cellphone, cash, ug usa ka plastic container.
Si PBGen Anthony Aberin, PRO7 Regional Director, nidayeg niining epektibong kampanya batok sa ilegal nga drugas sa Talisay City Police Station, sa pakigtambayayong sa LGU sa dakbayan sa Talisay.
“We are committed to working with local government and other law enforcement agencies to end the drug menace and bring offenders to justice. Our goal is to end illegal drugs in Central Visayas,” dugang ni PBgen Aberin.
Sa pagkakaron giandam na ang kasong kalapasan sa sections 5 ug 11 sa Republic Act 9165. (Renante Lada & Ting Joe Pepito)
(Source: PRO-7)