Nagmalapuson ang gipahigayon nga buy-bust operation sa mga sakop sa Philippine Drug Enforcement Agency Regional Office-7, Regional Special Enforcement Team Mandaue City Office (RSET-MCO), ug sa PDEA-7 Intelligence Section-Intelligence Operation Unit (IS-IOU), batok sa usa ka babaye nga tigpayuhot og ginadiling drugas.
Gilusad ang maong operation pasado alas 4:50 kagahapon sa hapon, Oktobre 11, 2024, didto sa Cokaliong Street, Brgy. Carreta, siyudad sa Sugbo.
Ang suspetsado giila sa mga otoridad nga mao si Maria Christine “Tinang” Gonzales Abarquez, 51, walay trabaho, ug taga-Brgy. Cogon Pardo, Siyudad sa Sugbo.
Mga binultong shabu ang nakuha sa position sa dinakpan na adunay timbang nga 5 ka kilo og standard drug value nga P34,000,000.00.
Ang pagkasikop sa dinakpan gisaksihan ni Cebu City Mayor Raymond Alvin Garcia.
Kalapasan sa Section 5 (pagbaligya) ug Section 11 (paghupot) sa Article II sa Republic Act 9165 (Comprehensive Dangerous Drugs Act of 2002) ang mga kasong atubangon ni Abarquez.
Sa pagkakaron padayon ang imbestigasyon sa kapulisan aron pagsuta kung si kinsa ang tig supply og ginadiling drugas sa dinakpan. (Renante Lada)