Miabot sa 93 ka indibidwal ang nadakpan sa gipahigayon nga anti-criminality operations sa Cebu City Police Office (CCPO) nga naglakip sa kaso sa pagbaligya og ilegal nga drogas, iligal nga sugal, pagpanag-iya og pusil nga walay lisensya, ug pagdakop sa mga wanted nga indibidwal.
Ang operasyon gipangulohan ni Acting City Director PCOL Enrico E. Figueroa ug gibuhat ubos sa mando ni Police Regional Office 7 Regional Director PBGEN Redrico A. Maranan gikan Marso 14 hangtod Marso 20, 2025.
Sa 48 ka operasyon, nasakmit ang ₱3,250,876.00 nga kantidad sa gituohang ilegal nga drogas.11 ka indibidwal ang nadakpan tungod sa ilegal nga sugal.12 usab ka pusil nga walay lisensya ang nasakmit. Samtang,19 ka pinangita nga kriminal ang nasikop.
Sa nagkadool nga Piniliay sa Mayo 2025, nagpakusog ang kapulisan sa ilang mga operasyon aron masiguro ang kalinaw ug kahapsay sa dakbayan. Ang CCPO nagpadayon sa ilang misyon sa pagbatok sa kriminalidad ug pagpanalipod sa katawhan.
Ang publiko gidasig nga magpabilin nga alerto ug makigkooperar sa mga awtoridad aron mapadayon ang kalinaw sa dakbayan. (Renante Socia Lada)
(Source: CCPO)