Sa hiniusang operasyon sa kapulisan niresulta sa pagkasakmit sa ilegal nga drugas ug pagkasikop sa usa ka high-profile drug suspect sa didto sa Consolacion, Sugbo, niadtong Hulyo 14, 2024.
Ang operasyon nga gihimo sa Provincial Drug Enforcement Unit, Provincial Intelligence Unit, ug Consolacion Municipal Police Station ubos sa Cebu Police Provincial Office (CPPO), nahitabo sa kaadlawon sa Domingo, Hulyo 14, sa Laray Road, Brgy. Jugan, sa Consolacion, Sugbo.
Nasakmit gikan sa indibidwal nga lalaki, 43 anyos, taga Brgy. Pasil, dakbayan sa Sugbo, ang mga sachet sa shabu nga motimbang og 300 gramos nga gibanabanang mobalor og PhP2,040,000, 850 ka ampules sa Nubain nga mobalor og PhP212,500, buy-bust money, ug usa ka backpack nga gigamit sa pagtago sa ilegal nga drugas.
Ang suspek nag-atubang og kasong kalapasan sa Republic Act 9165 ug kasamtangang gikustodiya sa kapolisan, samtang ang mga nakumpiska nga ilegal nga drugas gipadala sa Cebu City Forensic Unit alang sa laboratory examination.
Si PBGen. Anthony Aberin, PRO7 Regional Director nihatag ug gibug-aton sa determinasyon sa mga otoridad sa pagsumpo sa hulga sa drugas ug pagpanalipod sa komunidad gikan niining mga delikado nga substance.
“Our aggressive fight against illegal drugs in Central Visayas has translated to lesser occurrence of crimes and we shall continue this strategy of relentless anti-drug operations to ensure a safer and more secured Central Visayas,” matod ni PBGen Anthony Aberin. (Renante Lada & Ting Joe Pepito)
(Source: PRO-7)