Kapin sa 30 ka mga anti-illegal drug operations ang gilusad gikan sa alas 5:00 sa buntag niadtong Hulyo 19 hangtud alas 5:00 sa hapon sa Hulyo 20, 2024, nga misangpot sa pagkasikop sa kwarenta ka mga drug suspect uban ang pagsakmit sa 2,623.88 gramos sa gituohang shabu nga adunay standard value nga PhP17,842,384.00.
Usa sa mga operasyon nga misangpot sa maong mahinungdanong kalampusan mao ang buy-bust operation nga gihimo sa mga personahe sa Police Drug Enforcement Unit (PDEU)/Provincial Intelligence Unit (PIU) ug Cortez Municipal Police Station, Bohol Police Provincial Office, nga miresulta sa pagka- nasikop ang duha ka high-value drug suspects. Nasakmit gikan sa ilang possession ang 1,450 gramos nga illegal nga drugas nga mobalor og PhP9,860,000.00 ug uban pang drug paraphernalia.
Laing operasyon sa kapulisan nga gipangulohan sa mga personahe sa PDEU/PIU ug sa koordinasyon sa Sibulan Municipal Police Station, Negros Oriental Police Provincial Office, malampusong miresulta sa pagkasikop sa usa ka lalaki nga drug suspect diin nakuha sa mga operatiba ang 422.60 gramos nga ilegal nga drugas nga nagkantidad ug PhP2,873,680.00 uban sa ubang drug paraphernalia.
Gitumbok usab sa maong PRO ang pagkasakmit sa 295 gramos sa gituohang shabu nga mobalor og PhP2,006,000.00 gikan sa usa ka lalaki nga suspek atol sa buy-bust operation nga gipangulohan sa mga personahe sa Police Station 10, Cebu City Police Office.
Kini nga mga operasyon gipatuman subay sa mandato ni Regional Director Police Brigadier General Anthony A Aberin, nga pakusgon ang operasyon sa kapulisan isip usa sa mga preemptive measures aron masiguro ang umaabot nga 3rd State of the Nation Address ni His Excellency Ferdinand “Bongbong” Romualdez Marcos Jr., Presidente sa Republika sa Pilipinas.
Samtang, ang tanan nga uban pang mga kampanya batok sa kriminalidad gipakusog usab ug nagpadayon pa.
Sa pagsulat niini nga balita, ang maong mga dinakpan nga mga drug suspect kasamtangang gitanggong sa mga designated custodial facilities samtang giandam na ang mga dokumento alang sa tukmang pagpasaka og kaso sa korte tungod sa paglapas sa Republic Act 9165. Ang tanang mga ebidensiya nga nasakmit gisumiter usab sa Forensic Unit alang sa eksaminasyon.
“PRO 7’s commitment in ending the illegal drug menace is unwavering and until the last pusher is jailed, our anti-drug strategy will remain aggressive and non-stop in adherence with the call of SILG Atty. Benjamin Abalos Jr. relative to the Buhay ay Ingatan, Droga ay Ayawan program”, segon ni PBGen Anthony Aberin. (Renante Lada and Ting Joe Pepito)
(Source: PRO-7)