Usa ka malampusong buy-bust operation sa Barangay Dao, Tagbilaran City, kadlawon sa Domingo, Disyembre 1, 2024, diin nasakmit ang illegal nga drogas nga nagkantidad og P12.2 milyon. Kini ang usa sa pinakadakong drug haul nga operasyon sa Bohol karong tuiga.
Ang suspetsado nga si Terisito Salinas, hingkod ang panuigon, nga kaniadto na nadakpan tungod sa drug-related charges apan nakagawas pinaagi sa plea bargaining, ang gidakop sa maong operasyon.
Ang operasyon gipangulohan sa Provincial Intelligence Unit (PIU) sa Bohol Police Provincial Office, nga nagpakita sa padayon nga kampanya batok sa iligal nga droga sa rehiyon. Sa pagkakaron, gipadayon ang imbestigasyon aron masuta ang mga posibleng koneksyon ni Salinas sa mas lapad nga drug syndicate sa lugar.
Ang kapulisan nanawagan sa publiko nga magpabilin nga alerto ug suportahan ang mga kampanya batok sa drogas pinaagi sa pag-report sa mga kadudahang lihok sa ilang lugar. (Renante Socia Lada)