Gipahugot sa Cebu City Police Office (CCPO) ang kahimtang sa seguridad sa dakbayan atol sa payday period ug pagsugat sa Bag-ong Tuig, pinaagi sa pagpatuman sa One Time Big Time (OTBT) OPLAN BULABOG, kauban ang lokal nga kagamhanan sa Sugbo, mga boluntaryo, force multipliers, ug ubang law enforcement agencies.
Tumong sa mas hugot nga operasyon ang pagpugong sa mga kriminal nga mosulay pagpahimulos sa kapistahan ug sa daghang kalihokan sa publiko. Niadtong Disyembre 28, 2025 gikan alas 9:00 sa gabii hangtod alas 1:00 sa kadlawon sa Disyembre 29, gihimo sa CCPO ang OTBT OPLAN BULABOG sa Barangay Sawang Calero, Cebu City.
Ang operasyon gipahigayon sa Police Station 6 (PS6) uban sa suporta sa mga augmented units, ubos sa direktang pagdumala ni PCOL George V. Ylanan, Officer-in-Charge sa CCPO.
Kapin 132 ka PNP personnel, 4 ka CESET personnel, 18 ka Barangay Enforcement Officers (BEOs) ug 1 ka Gender and Development (GAD) Focal Person ang gi-deploy aron masiguro ang epektibong pagpatuman sa OPLAN Disiplina ug OPLAN Bulabog sa sakop nga lugar sa PS6.
Gipunting sa operasyon ang hugot nga foot ug mobile patrols, istriktong pagpatuman sa mga ordinansa sa Dakbayan sa Sugbo lakip ang curfew sa mga menor de edad, ug ang Oplan Bakal Sita aron masusi ang posibleng ginadiling butang ug mga delikadong hinagiban.
Sa resulta sa operasyon, siyam (9) ka hamtong ang nadakpan ug tulo (3) ka menor de edad ang naluwas tungod sa paglapas sa curfew. Naghatag usab ang mga otoridad og 16 ka citation tickets alang sa paglapas sa Anti-Smoking Ordinance (City Ordinance No. 2241), usa (1) alang sa Vape Ordinance (City Ordinance No. 2376), ug usa (1) alang sa Urinating/Littering Ordinance (City Ordinance No. 1361).
Dugang pa, 18 ka CESET citation tickets, 14 ka traffic citation tickets, ug usa (1) ka Temporary Operator’s Permit (TOP) ang gi-isyu atol sa maong operasyon.
Mipasalig si PCOL Ylanan nga magpadayon ang CCPO sa pagpalig-on sa seguridad ug proaktibong pagpatuman sa balaod aron mapadayon ang kalinaw ug kahapsay sa dakbayan atol sa holiday season.
Gitawag usab niya ang publiko nga magmatngon ug makigtambayayong sa kapulisan pinaagi sa dayong pagreport sa bisan unsang kahimtangang makapukaw sa kabalaka.
Nagpabiling lig-on ang Cebu City Police Office sa ilang misyon nga maghatag og luwas, malinaw ug seguradong palibot alang sa tanang residente ug bisita samtang nagsugat ang Sugbo sa Bag-ong Tuig.
Source: CCPO
I via Renante Socia Lada