Nagpadayon kagahapong adlawa, Disyembre 11, ang ikaduhang adlaw sa tulo ka adlaw nga distribusyon sa financial assistance alang sa mga biktima sa Super Typhoon Odette sa Carcar City. Gipahigayon ang pagpangtag sa Brgy. Poblacion I Gymnasium.
Uban sa Emergency Housing Assistance Program (EHAP) sa National Housing Authority (NHA), matag kwalipikadong panimalay nga naguba pag-ayo o nadaot tanan ang balay makadawat ug ₱10,000 nga tabang pinansyal.
Sa kagahapong adlawa, 2,031 ka benepisyaryo ang nakaschedule nga makadawat sa ayuda: 997 gikan sa Brgy. Valencia, 353 sa Brgy. Valladolid, 342 sa Brgy. Tuyom, ug 339 sa Brgy. Poblacion III.
Sumala sa NHA, ang Carcar City adunay 5,787 ka kwalipikadong benepisyaryo ug maoy unang LGU nga nakadawat sa tabang tungod kay kompleto kini sa tanang dokumentong gikinahanglan.
Matud pa sa ahensya, niadtong 2021 nag-allocate ang NHA ug ₱742 milyon para sa housing assistance sa Cebu Province human sa kadaut ni Odette. Apan ang maong pondo nauli sa National Treasury tungod sa panaglalis tali sa NHA ug sa miaging Capitol administration bahin sa angay gamiton nga listahan sa benepisyaryo. Ang NHA gusto gamiton ang listahan sa Office of Civil Defense (OCD) nga dunay kapin 70,000 ka pangalan, samtang ang Capitol mi-insist sa lista nga kapin 400,000.
Niadtong Nobyembre 18, misulat si Gov. Pamela Baricuatro ngadto sa NHA General Manager aron hangyoon nga i-reallocate ang pondo alang sa mga biktima sa Odette sa Cebu. Human pipila ka adlaw, gisultihan siya ni NHA Manager Joeben Tai nga gisugo ni Presidente Ferdinand Marcos Jr. ang pag-release sa pondo karong buwana.
Sa iyang sulat, giaseguro ni Gov. Baricuatro ang hingpit nga kooperasyon sa Capitol sa mga guidelines sa NHA.
Source: Cebu Province PIO
I via Renante Socia Lada