Misaka na sa kapin 155 mil ka pamilya o 547,394 ka indibidwal ang naapektuhan sa 6.9 magnitude nga linog nga nitay-og sa Bogo City ug ubang bahin sa amihanang Sugbo niadtong Septiyembre 30, base sa pinakabag-ong report sa National Disaster Risk Reduction and Management Council (NDRRMC) niadtong Lunes, Oktubre 6, 2025.
Sa maong datos, 405 ka pamilya ang nagpabilin sa upat ka evacuation centers samtang 7,357 pa ang nagpuyo karon sa temporaryong kapuy-an. Ang NDRRMC mipahibalo nga 72 ang kumpirmadong patay ug 559 ang naangol, apan ang tibuok lista kasamtangang gi-validate ug gi-verify pa sa mga otoridad.
Sumala sa Office of Civil Defense (OCD), posibleng molambo o mokunhod pa ang ihap samtang nagpadayon ang assessment sa Management of the Dead and Missing Persons Cluster nga gipangulohan sa Department of the Interior and Local Government (DILG).
Sa Rehiyon 7, mikabat na sa 35,925 ka balay ang nadaot tungod sa linog — diin 32,123 niini ang “partially damaged” ug 3,802 ang “totally damaged.” Wala pa magpagawas ang NDRRMC sa opisyal nga banabana sa kadaot sa imprastraktura ug agrikultura.
Sa bahin sa hinabang, ang Department of Social Welfare and Development (DSWD) mitabang na pinaagi sa ₱93.5 milyones nga kantidad sa pagkaon ug non-food items. Tibuok 187,858 ka pamilya na ang nakadawat og family food packs sukad niadtong Oktubre 5.
Kini nga linog mao ang usa sa labing kusog nga natala sa Sugbo sa miaging mga tuig, nga nagbilin og dakong kadaot ug kalisang sa mga komunidad sa amihanang bahin sa lalawigan.
I via Renante Socia Lada