Nasikop ang usa ka lalaki nga giingong nalambigit sa pagpanulis sa Basak Pardo, Dakbayan sa Sugbo atol sa usa ka COMELEC checkpoint sa St. Jude Acres, Barangay Bulacao, Cebu City niadtong Abril 2, 2025.
Nakuha sa iyang posisyon ang usa ka pusil nga wala narehistro, nga misangpot sa iyang pagdakop tungod sa paglapas sa Republic Act 10591 (Comprehensive Firearms and Ammunition Regulation Act) ug sa COMELEC Gun Ban.
Ang suspek, 29-anyos ug residente sa Cebu City, nasikop mga alas-8:45 sa gabii samtang misuway sa paglikay sa checkpoint pinaagi sa kalit nga pag-U-turn sa iyang motorsiklo. Ang mga operatiba sa likod nga bahin sa checkpoint dali siyang napara.
Sa nasayran, samtang nagkikistorya sa kapulisan, kalit niyang gipataas ang iyang mga kamot aron mosurender. Sa dihang iyang gisaka ang iyang mga kamot nahulog ang iyang armas, nadiskubre nga usa ka .9mm Colt MK IV nga pusil nga adunay tulo ka buhing bala.
Sa dugang imbestigasyon, natukma ang porma ug hitsura sa suspek sa CCTV footage sa pahpanulis nga nahitabo sa Basak Pardo niadtong Marso 21, 2025. Kini nagpalig-on sa suspetsya nga siya usa sa mga responsable sa maong insidente.
Giangkon usab sa suspek nga siya usa sa mga kauban sa grupo nga naghimo sa krimen, ug naghatag og dugang kasayuran nga makatabang sa imbestigasyon.
Matod ni PBGen Redrico A. Maranan, Regional Director sa PRO7, dako ang papel sa mga checkpoint operation sa pagsiguro sa kaluwasan sa publiko.
Ang suspek kasamtangang natanggong sa Police Station 7 ug gilauman nga pasakaan og daghang mga kaso, lakip ang ilegal nga pagpanag-iya og pusil ug bala, paglapas sa COMELEC Gun Ban, ug dugang kasong may kalambigitan sa pagpanulis nga nagpadayon pang imbestigasyon.
Source: PRO7- PIO
I via Renante Socia Lada
#rpndykccebu