Nagmalampuson ang usa ka contingency planning nga gipahigayon kagahapon adlawa, Hunyo 20, 2024, sa Cebu City Disaster Risk Reduction and Management Office (CCDRRMO), agi og pagpangandam alang sa Palarong Pambansa sunod buwan.
Kaabag sa CCDRRMO sa maong kalihokan ang City Health Department; Cebu City Transportation Office; barangay-based responders, fire volunteers; ug mga ahensiya sa gobiyerno sama sa Bureau of Fire Protection, Armed Forces of the Philippines-Visayas Command, Philippine National Police, Philippine Drug Enforcement Agency, Philippine Coast Guard, ug Department of Education-Cebu City.
Matod ni Dexter Tudtud, luyoluyong labaw sa CCDRRMO, nga lakip sa ilang gihisgotan mao ang lainlain nga posibleng mga kakulian nga mahitabo nga andaman nila og detalyadong mga pamaagi kada usa isip tubag.
“Atong gi-review ang mga protocols, logistical plans, emergency procedure, ug ang, of course, atong communication strategies. Mao ni atong gibuhat diri para ma-address nato kung unsay mga potential risks nga moabot sa Palarong Pambansa,” ingon niya.
Gihimong sumbanan sa contingency plan ang bag-ohay lang nahuman nga Central Visayas Regional Athletic Association meet nga gipahigayon dinhi sa siyudad sa Sugbo.
“Kahibawo man ‘ta this a prestigious event. So, dili pwede ang Cebu City dili gyud andam. Andam gyud ta,” sulti ni Tudtud.
Apil sa nasabotan nga magbutang ang CCDRRMO og Incident Command Post aron daling matubag ang mga panginahanglan, ilabi na sa motumaw nga emerhensiya atol sa Palarong Pambansa.
“Sa billeting (quarters)…naa tay safety officers nga ibutang didto. Diri sad sa venues naa sad tay mga emergency responders, like, naa gyud tay ambulance. Sa uban, like for example, naay duwa nga contact sport, physical nga duwa, so naa gud tay mga ambulance nga atong ibutang didto,” segon ni Tudtud. (Renante Socia Lada)
(Source: Cebu City PIO)